شعری سوادکوهی از استاد امیر حسین بهمنی سوادکوهی
مشته ماه در بمو آستوک آستوک
استاره دربزو آستوک آستوک
کوهه جا بورده لو آستوک آستوک
اینجه البرز دیم سوسو زنده
هم نسوم هم خریم سوسو زنده
تا سوادکوه دره دنیا سبزه
امه امروز امه فردا سبزه
کوه سر هارشین تمشا دارنه
آسمون تا زمین تمشا دارنه
مثل دیوار چین تمشا دارنه
اینجه البرز دیم سوسو زنده
هم نسوم هم خریم سوسو زنده
تا سوادکوه دره دنیا سبزه
امه امروز امه فردا سبزه
آسمون ره کهو اینجه ویندی
جنگل رنگ و رو اینجه ویندی
انجلی با کلو اینجه ویندی
اینجه البرز دیم سوسو زنده
هم نسوم هم خریم سوسو زنده
تا سوادکوه دره دنیا سبزه
امه امروز امه فردا سبزه
اینجه کولاک دم موندگاره
برف ور دم نزو سوره داره
امه اجداده جا یادگاره
اینجه البرزه دیم سوسو زنده
هم نسوم هم خریم سوسو زنده
تا سوادکوه دره دنیا سبزه
امه امروز امه فردا سبزه
اینجه دنیا لته لتکا هسته
ته پلائه اگه تیسا هسته
مرد کاره اگه دونا هسته
اینجه البرز دیم سوسو زنده
هم نسوم هم خریم سوسو زنده
تا سوادکوه دره دنیا سبزه
امه امروز امه فردا سبزه
اینجه مردم شه کوهه وارینه
سخته سر سنگه دل اما نینه
مردوزن شمعنه پاپلینه
اینجه البرز دیم سوسو زنده
هم نسوم هم خریم سوسو زنده
تا سوادکوه دره دنیا سبزه
امه امروز امه فردا سبزه
شو اگه ماها او ماهی دارنه
اصفهون مسجد شاهی دارنه
مازرون هم سوادکوهی دارنه
اینجه البرز دیم سوسو زنده
هم نسوم هم خریم سوسو زنده
تا سوادکوه دره دنیا سبزه
امه امروز امه فردا سبزه
